Na Dina Ismail
SHIRIKISHO la  soka Tanzania (TFF) miaka kadhaa iliyopita liliweka kanuni ya kila timu inayoshiriki ligi Kuu soka Tanzania Bara kuwa na timu za Vijana, yaani ile ya miaka chini  ya 17 na 20.
TFF ilifanya hivyo kwa minajiri ya kuinua na kuendeleza soka la Tanzania, pia kusaidia kupatikana kwa hazina ya wachezaji kwa ajili ya baadaye.
Kama hiyo haitoshi, ilianzisha ligi maalum ya timu hizo za vijana ambayo imekuwa ikifanyika kipindi ambacho mzunguko wa kwanza wa Ligi Kuu Bara unakuwa umesimama.
Kwa kiasi kikubwa michuano hiyo imekuwa ikileta na msisimko mkubwa kutokana na wachezaji wa timu husika kuonesha vipaji vya hali ya juu.
Pia kupitia michuano hiyo, kumetoa nafasi kwa viongozi wa timu zao kuona wachezaji ambao wanafaa kupandishwa hadi timu za wakubwa.
Lakini, ukiangalia ama kufuatilia kwa umakini utabaini kwamba baadhi ya timu hizo za vijana ‘zipo zipo’  kwani hata lengo la kuinua na kuendeleza vipaji halitiliwi maana.
Kwamba, timu za vijana zipo lakini kipindi cha usajili viongozi wanahaha kusaka wachezaji toka Simba, Yanga, Azam, Kagera Sugar na kadhalika badala ya kupandisha wachezaji wa timu zao za vijana.
Ni sawa kwao kusaka wachezaji wenye uzoefu, lakini angalau wangekuwa wanachukua hata wachezaji watano kutoka katika kikosi cha cha vijana na kasha nafasi zingine ndio kusaka magwiji na wale wa kigeni.
Kwani bila ya kuwapandisha katika kikosi cha wakubwa itakuwa ni sawa na kuuwa vipaji vyako na kuzidi kudumaza soka la Tanzania.
Kama hiyo haitoshi, kupandisha daraja wachezaji wa timu hizo za vijana kutasaidia kubana matumizi kwa kiasi fulani kwani tumeshuhudia mamilioni ya pesa yakitumika kusajili wachezaji wazoefu na wale ‘mapro’.
Swali la kujiuliza, kuna faida gani ya kuwa na timu za vijana kama hawawezi kupandishwa madaraja, mwisho wa siku inakuwa mchawi wa soka ni timu zenyewe kwani zinashindwa kuvuna matunda yake na kwenda kusaka ya nje.
Angalau tunaona baadhi ya wachezaji waliopandishwa kutoka timu za vijana wakichanua katika timu zao kwa misimu kadhaa lakini baada ya muda wanapotea katika medani ya soka.
Baadhi ya wachezaji kama Frank Domayo , Haruna Chanongo, Ramadhan Singano, Jonas Mkude, Hassan Isihaka, Peter Manyika na wengineo ni baadhi ya matunda ya timu za vijana katika Ligi Kuu Bara.
Kama hiyo haitoshi, majina ya wachezaji hao yalikuwa chaguo la mara kwa mara katika vikosi vya timu ya Taifa kwa nyakati tofauti.
Sijui tatizo ni nini, kwani kwa sasa moto wa nyota hao chipukizi umezimika ghafla na wengi wameachwa katika timu zilizowapandisha, huku wengine wakiishia kukosa namba katika kikosi cha kwanza.
Na kwa hali ilivyo itawawia vigumu sana kurejesha hadhi yao kama ilivyokuwa mwanzo na hiyo inatokana na mfumo wa soka la Tanzania ulivyo.
Tulitaraji viwango vyao vingedumu kwa muda mrefu kama ilivyokuwa enzi za kina Sekilojo Chambua, Madaraka Suleiman, Mohammed Manyika, George Masatu, Mohammed Hussein ‘Mmachinga’ na wengineo, lakini imekuwa tofauti na sasa hivi tunaweza kusema  ‘wapo wapo’.
Thomas Ulimwengu na Mbwana Samatta ni mfano wa kuigwa kwa wachezaji ‘chapuo’ la timu za vijana, kwani hawa wana vipaji pia kama walivyo wenzao lakini wasimamizi wao walisoma alama za nyakati, na leo hii ni ‘habari nyingine’.
Nadhani ni wakati muafaka kwa vilabu vya ligi kuu kuiga wa nchi zilizopiga hatua katika medani ya soka ambazo kuwapa nafasi zaidi wachezaji vijana ambao wakisimamiwa vema wataleta manufaa katika siku za usoni.
Tunaona wachezaji wengi nyota wa Ulaya wameibuka wakiwa wadogo na wamejitahidi kwa kiasi kikubwa ‘kumantain’ viwango vyao kwa muda mrefu na hatimaye ili tuweze kuwa na mafanikio katika soka.
Lakini kwa Tanzania bado hatuwatilii maanani wachezaji chipukizi,na tumekuwa tukikumbatia wachezaji wakongwe tu ambao baadhi yao hawana hata viwango vikubwa kama ilivyo kwa vijana lakini tunaona wakipewa nafasi.
Kwani hata hao waliobahatika kuwemo wameshindwa kulelewa ipasavyo matokeo yake wamejikuta wakiishia katika pasi na kufika safari yao.
Kwa hali hiyo nashindwa kuelewa faida ya kuanzishwa kwa timu B maana uwepo wake ni kama kutimiza wajibu tu!




Na Dina Ismail

GOLIKIPA  mkongwe wa Tanzania, Ivo Mapunda  wiki  iliyopita alifungua kituo maalum cha kuibua na kuendeleza vipaji  vya  soka kwa vijana wadogo  wenye umri wa kuanzia miaka mitano hadi 18.
Kituo hicho kilichopo maeneo ya Mwanagati, Kitunda huko jijini Dar es Salaam kitajulikana kama Ivo Mapunda Sports Center.
Katika miaka ya hivi  karibuni, kumekuwa na urasimu wa uwepo wa vituo vingi vya namna hiyo   kwani  vingi ‘vipovipo’ tu  kwa vile  wachezaji wengi wazuri ambao wanatamba na kufanya vema katika medani ya soka nchini hawatokei huko.
Nchi zilizoendelea katika soka zina utitiri mwingi wa vituo vya namna hiyo hivyo kuwepo kwa ushindani wa wachezaji ambao wamepitia huko pindi wanapofanikiwa kuanza kucheza soka la ushindani, tofauti na hapa nchini ambapo wachezaji wengi wanaibuka wakutokea  mitaani.
Kwamba matokeo yake  tumekuwa tukitegemea wachezaji wale wale, hali inayofanya soka la Tanzania lizidi kudumaa na matokeo yake kushindwa kufurukuta kwenye medani za  kimataifa.
Ivo Mapunda anasema anaamini ujio wa kituo hicho utasaidia kuleta changamoto katika medani ya soka na hasa ikizingatiwa  amepata kuwamo katika timu mbalimbali hivyo anaamini atazalisha vipaji stahili.
“Nimekuwa  mchezaji ndani na nje ya nchi kwa miaka mingi hivyo kwa uzoefu wangi nitawapa mbinu nzuri za kuwafanya waweze kufika mbali baada ya kumaliza  mafunzo yao katika kituo change,”anasema
Mapunda  ambaye alipata kuzidakia timu kongwe anasema anaongeza kuwa kituo hicho pia “nimeanzisha kituo hiki ili kusaidia vijana wasio na kazi hivyo itasaidia kupata ajira kupitia michezo,”anaongeza
Anasema pamoja na mafunzo ya soka kituo hiko kitakuwa kikiwapa ushauri wa kujitambua vijana hao ili iwe rahisi kwao kukabiliana na changamoto watakazokutana nazo katika safari zao za kucheza soka la kiushindani.
“Ni matumaini yangu vijana watakaotoka hapa watakuwa katika ngazi nyingine, nimedhamiria kuleta mapinduzi katika vituo vya vijana, hivyo ninaomba sapoti ya wazazi na Watanzania kwa ujumla ili tuweze kuzalisha wachezaji wazuri”,anaongeza Mapunda
Ivo Philip Mapunda ni mmoja ya makipa waliojijengea heshima hapa nchini ambaye kwa sasa hachezi soka la ushindani tangu alipoachwa na klabu yake ya Azam mwaka 2015 na hivyo amekuwa akifanya mazoezi mtaani kwa ajili ya kujiweka fiti.

Mapunda ambaye aliwahi kuwemo kwenye kikosi cha timu ya Taifa, pia amepata kuzidakia pia timu za Gor Mahia ya Kenya, St.George ya Ethiopia na Congo United kwa nyakati tofauti.

Joseph Kaniki 'Golota'


Na Dina Ismail

TANZANIA imejaliwa kuwa na vipaji vya hali ya juu katika michezo na hasa mpira wa miguu lakini imeshindwa kufanya vema katika medani za kimataifa.
Wengi wa wachezaji ambao walibahatika kufikia hatua ya kucheza hadi  timu ya Taifa  wameshindwa kudumu kwa muda mrefu kama ilivyo kwa nchi nyingine zilizoendelea licha ya kuwa na uwezo mkubwa.
Haijajulikana sababu hasa ya wachezaji  wengi wazuri kutodumu kwa muda mrefu kucheza soka  ushindani licha ya umri wao kuwa bado unaruhusu na pia kuwa na vipaji.
Ukiangalia kwa haraka haraka kinachopelekea hali hiyo ni utovu wa nidhamu pamoja na  mfumo mzima wa uongozi wa soka hapa nchini.
Hali hiyo imekuwa ikishika kasi katikati  ya  miaka ya 2000 ambapo tumeshuhudia wachezaji wengi wazuri ambao walikuwa wakifanya vema katika timu mbalimbali na hasa za Ligi Kuu.
Katika makala hii tutawazungumzia  baadhi ya wachezaji  waliopo kwenye kundi hilo ambao kutokana na changamoto mbalimbali  huenda  mpaka hii leo wangekuwa ni baadhi ya nyota waliomo kwenye kikosi cha timu ya Taifa au kucheza soka la kulipwa.

Emmanuel Gabriel Mwakyusa:
Jina lake lilipata umaarufu zaidi mwanzoni mwa miaka ya 2000 aliposajiliwa na Klabu ya Simba kutoka klabu ya Nazareth ya Njombe.
Mshambuliaji huyo mwenye nguvu na kasi ya ajabu awapo uwanjani alikuwa ni mmoja ya wachezaji wa Simba ambao waliiwezesha kufanya vema kwenye michuano ya kitaifa na Kimataifa.
Gabriel ambaye alipachikwa jina la Batigol akifananishwa  na nyota wa Kiargentina Gabriel Batistuta ‘Batigol’, aliitumikia klabu ya Simba kabla ya kuuzwa katika klabu ya Fanja ya Oman.
Nyota huyo pia amepata kuzitumikia klabu za AFC ya Arusha na Prisons ya Mbeya kwa nyakati tofauti, tangu alipoondoka Simba nyota yake ilififia licha ya umahiri aliokuwa nao.
Batigol ambaye alijizolea umaarufu zaidi kutokana na kufunga mabao kwa kichwa kupitea kwake pia kulichangiwa pia baada ya kupata majeraha kwa muda mrefu na hivyo baada ya kupona ameshindwa kurudi katika fomu.

Amir Maftah:
Ni mmoja ya mabeki mahiri hapa nchini ambaye alipata kuzichezea klabu kongwe hapa nchini, Simba na Yanga kwa nyakati tofauti.
 Maftah aliyesajiliwa Simba mwaka 2011 baada ya kutemwa Yanga ni mmoja ya mabeki mahiri nchini ambaye amekuwa akitumika vema katika klabu anazozitumikia pindi awapo uwanjani.
Beki huyo wa kushoto ambaye pia alipata kuitumikia timu ya Taifa kwa nyakati tofauti, aliibukia katika klabu ya Pamba ya Mwanza kwa sasa anaitumikia klabu ya Friends Rangers ambayo inashiriki Ligi daraja la kwanza.
Licha ya umahiri na kipaji alichonacho,  Maftah ni mmoja ya wachezaji wazuri ambao bado hajafikia hatua ya kuangukia katika  ligi daraja la kwanza.

Joseph Kaniki ‘Golota’:
Mashabiki wa soka bado wanalikumbuka sana jina lake kutokana na umahiri alikuwa nao enzi akiicheza soka hapa nchini katika klabu ya Simba na timu ya Taifa.
Umahiri wa mshambuliaji huyo mwenye nguvu na kasi awapo uwanjani ulimuwezesha kuipa ushindi mnono timu yake pindi anapopangwa.
Akiwa ni mmoja ya wachezaji waliochangia mafanikio ya Simba katika miaka ya mwanzoni mwa 2000, soka lake lilianza kushuka baada ya kuhusishwa na vitendo vya utovu wa nidhamu.
Baada ya kutoka Simba, alizichezea kwa nyakati tofauti klabu za Mtibwa Sugar ya Morogoro, Al tali’aa ya Misri na Rayon ya Rwanda na klabu ya daraja la pili KonyaSpor (KIF) nchini Sweden.
Golota ambaye kwa sasa anatumikia kifungo cha miaka saba na nunsu nchini Ethiopia baada ya kukamatwa mwaka 2012 nchini humo akiwa na dawa za kulevya ni mmoja ya wachezaji ambao wangeweza kuwa kwenye  timu kubwa za ligi kuu akicheza soka la ushindani mpaka sasa.

Nsa Job Mahinya:
Ni mmoja ya wachezaji wenye vipaji vya aina yake ambaye umahiri wak ulimuwezesha kujipatia umaarufu mkubwa nchini.
 Job ambaye alipata kuzitumikia klabu kongwe za Simba na Yanga kwa nyakati tofauti ni mmoja ya washabuliaji wanaotumia vema uwezo wao wapatapo nafasi uwanjani.
Umahiri wake ulimuwezesha kuitumikia pia timu ya Taifa kwa nyakati tofauti lakini jina lake lilipotea baada ya kupata majeruhi akiwa klabu ya Azam Fc.
Pia amepata kuzitumia klabu za Azam Fc, Moro United na African Sports ya Tanga.

Boniface Pawasa:
Mashabiki wa soka nchini bado wanamkumbuka beki huyu kisiki wa zamani wa klabu ya Simba na timu ya Taifa.
Pawasa ambaye alijunga na Simba mwanzoni mwa miaka ya 2000 akitokea CDA ya Dodoma ni mmoja ya wachezaji waliokuwa tishio uwanjani kutokana na kuwa na uwezo mkubwa wa kuhimili vishindo vya timu pinzani .
Hata hivyo nyota ya mchezaji huyo ilianza kupotea katikati ya miaka ya 2000 baada ya Simba kumsimamisha kabla ya kumuacha kabisa kwa madai ya utovu wa nidhamu  na kisha nyota huyo kutimkia nchini Rwanda na Uarabuni kucheza soka la kulipwa kwa nyakati tofauti.
Pawasa alipata kuwa mmoja ya wachezaji wa kwanza ambao waliipandisha Azam Fc kutoka Ligi Daraja la kwanza hadi Ligi Kuu Bara.
Kwa kipaji alichonacho angekuwa ni mmoja ya wachezaji ambao wangekuwa gumzo katika medani ya soka mpaka sasa.
PAwasa kwa sasa hachezi soka ya ushindani huku akijikita zaidi katika kujiendeleza katika hatua ya ukocha wa soka.

Victor Costa:
Jina lake halisi ni Victor Nampoka, ni moja ya mabeki wenye nguvu na uwezo mmkubwa uwanjani.
Costa  jina lake lilipata umaarufu zaidi mwanzoni mwa mwaka 2000 akiwa na klabu ya Simba ambapo mwaka 2003 alikuwa ni mmoja ya wachezaji wa timu hiyo waliofanikiwa kuivua ubingwa Afrika Zamalek ya Misri.
Nyota huyo ambaye pia alikuwa ni mmoja ya wachezaji waliokuwa wakiichezea timu ya Taifa ya Tanzania alianza kupotea kwenye mwaka 2005 baada ya kuumia kisigino akiitumikia timu ya Taifa.
Baada ya kujiuguza kwa muda mrefu na kupona alitimkia nchini Msumbiji na kwenda kuitumikia klabu ya  Agasabe Disongo kwa misimu kadhaa, kabla ya kurejea tena nchini na kujiunga na Simba.
Hata hivyo, jina la Costa limekuwa likipotea taratibu tangu alipoumia.
Costa aambaye kwa sasa yupo Visiwani Zanzibar akiwa na timu yake ya zamani ya Jang’ombe kama kocha mchezaji, alipata kuzicheza pia timu za Mtibwa Sugar, Mwadui Fc na Ashanti United.
Ramadhan Chombo ‘Redondo’:
Kwa sasa anakipiga katika klabu ya Mbeya City inayoshiriki Ligi Kuu Bara.
Redondo ni mmoja ya viungo mahiri ambao walipata kuwika miaka ya nyuma na umahiri wake ulimfanya kuchaguliwa kuichezea timu ya Taifa ya Tanzania.
Nyota yake ilianza kung’ara mwaka 2000 akiwa katika kituo cha kukuza vipaji cha DSM youth Centre kablya ya kutimkia nchini Norway mwaka 2003 alipojiunga na klabu ya daraja la pili  ya Lyngdal na kisha kerejea nchini mwaka 2007 alipojiunga na Ashanti United.
Kutokana na umahiri wake,Redondo ambaye pia humudu nafasi ya winga alinyakuliwa na Simba mwaka 2008 ambako alidumu nayo hadi 2010 na kisha kerejea tena Azam Fc na baadaye kutimkia nchini Msumbiji na kisha kurejea nchini alipojiunga na Mbeya City.

Kipaji na uwezo mkubwa alionao Redondo ni mmoja ya wachezaji ambao wangekuwa juu kwa sasa kama si kuwepo kwa changamoto kwenye medani ya soka.





Na Dina Ismail

MUZIKI wa bongo fleva umekuwa ukishika kasi katika miaka ya hivi karibuni huku tukishuhudia kuibuka kwa wasanii wapya kila kukicha.
Zamani ilikuwa ngumu kwa wasanii mmoja mmoja kufanya vema katika tasnia hiyo, ni makundi tu ndio yalipata wasaa wa kutamba.Ingawa kuna baadhi akiwemo Joseph Mbilinyi ‘Sugu’ walifanikiwa ckupasua anga wakisimama wenyewe.
Tulishuhudia kufanya vema kwa makundi kama Gansters With Matatizo (GWM), Daz Nundaz, Wateule, Kwanza Unity, Hard Blasters, TIP TOP Connection, Solid Ground Family, East Coast Team, TMK Family  na mengineo ambayo yalisheheni wasanii wenye vipaji vya hali ya juu.
Hata hivyo kuna baadhi ya wasanii waliamua kujiweka kando na kuimba kama wasanii wa kujitegemea, matokeo yake nyota zao hazikuweza kung’ara kama ilivyokuwa ndani ya makundi.
Hawa ni baadhi ya wasanii waliopata umaarufu kupitia makundi, lakini baada ya kuwa wasanii wa kujitegemea wameshindwa kufanya vema licha ya umahiri walionao.

JUMA NATURE:
Nguli huyu wa muziki ni mmoja ya wasanii wenye nyota kali sana.Alitamba zaidi akiwa na makundi ya Wachuja Nafaka,  TMK Wanaume Family, TMK Wanaume Halisi ambapo alikuwa ni msanii mwenye mvuto wa kipekee katika kipindi kile.
Kipindi alipata kutamba na singo kama Ugali, Sitaki Demu, Sonia na nyinginezo na mashabiki walikuwa wakiripuka kwa shangwe pindi alipotajwa kuwa ni zamu yake kutumbuiza katika majukwaa mnbalimbali ya muziki .
Kipindi alipata kutamba na singo kama Ugali, Sitaki Demu, Sonia,  na nyinginezo na mashabiki walikuwa wakiripuka kwa shangwe pindi alipotajwa kuwa ni zamu yake kutumbuiza katika majukwaa mbalimbali ya muziki..
Hata hivyo Nature aliamua kuacha na makundi na kuwa msanii wa kujitegemea na kama ilivyo kwa wengine Nature hakuweza kung’ara sana kama alivyokuwa kwenye kundi.

MCHIZI MOX:
Ni mmoja ya wasanii ninaowapenda na kuvutiwa na kazi zake  kwani kila anapoingiza mashairi lazima kitoke kitu kimoja matata sana.
Mkali huyu anayekwenda kwa jina la Taikun Ally, nyota yake inaonekana kung’ara zaidi anaponya kazi na kundi kwani pindi akiwa kundi na Wateule na wenzake alipata kuwa gumzo kutokana na aina ya uimbaji na sauti yake ya kipekee.
Lakini kundi la Wateule halikuwa kundi mahususi kwani wasanii waliounda ni wale waliounganishwa toka makundi tofauti na ambao tayari walishatoka kimuziki baada ya kufanyika shindano moja la vipaji akiwemo Solo Thang, Jay Moe,Kelvin, Lady Lu, Jaffarie,  Mox na wengineo.
Mox alipata kutamba na nyimbo kama kadhaa zikiwo Vipi Mambo, Kinyumenyume, Piga Makofi na nyingine ambazo alizifanya kama msanii binafsi huku pia akifanya vema kwenye nyimbo za kushirikishwa.
Hata hivyo pamoja na jina la Mox kutokuwa juu kwa sasa lakini bado anaendelea na kazi zake za sanaa.

INSPECTOR HAROUN ‘BABU’:
Mkali huyu wa ‘Rap Cartoon’ alipata kutamba enzi hizo kama mmoja ya waasisi wa makundi ya bongo fleva alipokuwa kwenye kundi la Gangwe Mobb akiwa na swahiba wake Luten Karama.
Gangwe Mob lilikuwa moja ya makundi yaliyokuwa tishio huku vibao kama Tunajirusha, Nje Ndani, rap Katuni na nyinginezo huku Inspector akitoka na nyimbo zake mtoto  binafsi kama Mtoto wa Geti Kali, Asali wa Moyo na nyinginezo.
Baadaye kundi hilo lilichangwanywa na TMK Wanaume family hivyo Inspecta na KArama wakawa wasanii wa TMK na kuendeleza sanaa zao kama kawaida.
 Hata hivyo Inspector alijitoa TMK Wanaume na kisha kuwa msanii wa kujitegemea ambapo hata hivyo alishjindwa kung’ara temna kama ilivyokuwa enzi za ‘Asali wa Moyo’ .

CRAZY GK:
 Katikati ya miaka ya 2000 GK alikuwa mmoja ya wasanii maarufu kupitia kundi la East Coast Team (ECT) lililokuwa na wakali kama Mwana FA, Snare,O -Ten Ay, Pauline Zongo na wengineo.
ECT lilijizolea umaarufu kutokana umahiri walionao wasanii wake kiasi cha kuwa moja ya makundi tishio hapa nchini.
Hata hivyo kundi hilo halikdumu kwa muda mrefu baada ya wasanii wqake kutawanyika kutokana na sababu tofauti.
GK ambaye alikuwa mmoja wa viongozi wake, tangu kusambaratika kwa kundi hilo ameshindwa kufanya vema kwenye tasnia ya bongo fleva kama ‘solo artist’ licha ya kujaribu kutoa singo kadhaa.

CASSIM  MGANGA:
kwa mashabiki wa nyimbo za mapenzi wengi wanafahamu kipaji chake.
Nyimbo za Awena, Haiwezekani na nyingine ndizo zilizomtambulisha katika tasnia ya bongo fleva huku akifanya kazi chini ya kundi la TIP Top Connection chini ya uongozi wa Batu Tale.
Hata hivyo Cassim alijitoa Tip Top na kufanya kazi mwenyewe.
Hata hivyo ameshindwa kutikisa anga zaidi kama ilivyokuwa zamani licha ya kutoa nyimbo nzuri na zenye ujumbe maridadi.

DAZ BABA:
Wengi mnalilikumbuka kundi la Daz Nundaz ambalo lilipanda kutamba na singo zake kama Barua, Jahazi na nyinginezo.Likiundwa na wakali kama Daz baba, daz Mwalimu,Ferooz na la Rhumba.
Kundi hilo halikudumu sana kwani wasanii wake akiwemo Daz Baba waliamua kufanya kazi binafsi ambapo kwa kiasi kikubwa walijitahidi kutoa vibao vilivyowashika mashabiki.
Daz Baba naye alipata kutoa nyimbo zake kadhaa kama mrembo namba 8, Wife alomshirikisha Ngwair, Nipe tano na nyinginezo, lakini hakuweza kutamba sana kabla ya kupotea kwnye medani ya muziki huo huku akidaiwa kujihusisha na utumiaji wa dawa za kulevya.

O- TEN:
Ni mmoja ya wasanii waliopata kutamba miaka ya nyuma akiwa na kundi la ECT.
Jina lake halisi ni Philipo Nyandindi ambapo alipata umaarufu kupitia nyimbo kadhaa zikiwemo Nicheck, Akipendacho binti na nyinginezo.
Hata hivyo tangu kusambaratika kwa East Coast nyota ya O –Ten imeshindwa kuendelea kung’ara.

Z-ANTO:
Ni mmoja ya wasanii waliopata kutikisa katika anga za muziki wa kizazi kipya akitokea kundi la Tip Top Connection.
Z-Anto ambaye mwenye sauti ya aina yake alipata kutamba na nyimbo kama Binti Kiziwi, Mpenzi Jini, Kisiwa cha Malavidavi na nyinginezo.
Hata hivyo Z-Anto alijitoa Tip Top na kisha kutoa nyimbo zake kadhaa ambazo hazikuweza kufanya vema kama alivyokuwa chini ya kundi.

SPARK:
Kwa mashabiki wa nyimbo za kubembeleza, wengi watamkumbuka Spark kutokana kuwa na sauti tamu yenye kuvuta hisia pindi usikilizapo nyimbo zake.
Aliibukia Tip Top connection na nyimbo kama Jela aliomshirikisha Tundaman na Madee, Usinitose aliomshirikisha Chid Benz  na nyinginezo.
Baada ya kujitoa Tip Top nyota yake imefifia licha ya kujaribu kutoa baadhi ya nyimbo lakini ameshindwa kutamba.

Witness Mwijage:
MDADA huyu mkali wa Rap aliibukia katika michuano ya Cocacola Pop Star pamoja na wenzake Sarah Kais ‘Shah’ na marehemu Langa Kileo kupitia kundi la Wakilisha.
Kupitia kundi hilo walipata kutoa kutoa nyimbo kali kama Hoi, Kiswanglish na nyinginezo ambazo zilwaweka katika matawi ya juu.
Hata hivyo kundi hilo halikudumu kwa muda mrefu kabla ya kuvunjika ambapo kila msanii aliamua kufanya kazi kivyake.

Witness maarufu kama ‘Kibonge Mwepesi’ nayo ambaye ni hodari zaidi katika kurap ameweza kutoa nyimbo kadhaa kama msanii wa kujitegemea zikiwemo Zero, Attentio, safari, Buku Jero na nyinginezo  na nyinginezo lakini bado jina lake halikuweza kuwa juu kama alivykuwa na Wakilisha.




Na Dina Ismail
LICHA ya uongozi wa Simba kutaka kumrejesha mshambuliaji  wa kimataifa Mganda Emmanuel Okwi, kocha mkuu wa timu hiyo, Mcameroon Joseph Marius Omog  hajakubaliana na hilo.
Habari za kuaminika kutoka klabu ya Simba zinaeleza kwamba, Omog kabla ya kuondoka alipendekeza majina ya wachezaji ambao anataka wasajiliwe na katika hiyo orodha hakukuwa na jina la Okwi.
Imeelezwa kwamba katika ripoti ya Omog, amepanga kuleta kipa na mshambuliaji  kutoka nchini Ivory Coast kwa ajili ya kukiimarisha kikosi cha timu hiyo katika mzunguko wa pili wa ligi kuu bara.
Omog ambaye alikwenda likizo  kwao baada  kumalizika kwa mzunguko wa pili ulioiacha Simba katika nafasi ya kwanza, anatarajiwa kurejea nchini wakati wowote kuanzia sasa kwa ajili ya kuendelea kukinoa kikosi chake.
Simba ambayo ilimuuza Okwi mwaka juzi kwa dau la dola 100 katika klabu ya Sonderjiske ya Denmark. ilipanga kumrejesha Okwi  kwa dau la dola za Marekani 120,000 ( zaidi ya Sh milioni 240).
Hata hivyo, habari zinaeleza kwamba, licha ya kocha kutompendekeza Okwi katika usajili wake, uongozi wa Simba umeona  dau lake ni kubwa ukilinganisha na kiwango alichonacho kwa sasa.
“Haiwezekani  Okwi kununuliwa kwa gharama hiyo, yaani tumuuze kwa dola 100 halafu tumnunue kwa dola 120 kwa kiwango gani zaidi, kwanza kocha hajamtaka  na amepanga kuleta mshambuliaji mahiri kutoka Ivory Coast, alisema kiongozi huyo

Okwi  alipata kujiunga Simba kwa mara ya kwanza mwaka 2010 na kuiwezesha kutwaa mataji kadhaa kabla ya mwaka 2013 kuzwa  Etoile du Sahel ya Tunisia dola 300,000.
Duru la Pili la Ligi Kuu ya Vodacom Tanzania Bara inatarajiwa kuanza leo kwa michezo minne kabla ya michezo mingine minne kufanyikakeshoDesemba 18, mwaka huu.
Katika mechi za kesho, Mabingwa watetezi wa taji hilo, Young Africans SC ya Dar es Salaam itakuwa mgeni wa JKT Ruvu ya Pwani kwenye mchezo utakaofanyika Uwanja wa Uhuru, Dar es Salaam.
Licha ya kwamba mwenyeji wa mchezo huo ni JKT Ruvu ambayo uwanja wake wa nyumbani mara nyingi huwa ni Mabatini ulioko Mlandizi, lakini kwa mujibu wa Kanuni ya 6 (5) na (6) ya Ligi Kuu Bara, mechi zake za nyumbani dhidi ya Simba, Young Africans na Azam FC, hufanyika Uwanja wa Uhuru.
Michezo mingine ya kesho ni Kagera Sugar kuwa mgeni wa Mbeya City kwenye Uwanja wa Sokoine jijini Mbeya wakati Ruvu Shooting ya Pwani itakuwa mwenyeji wa Mtibwa Sugar ya Morogoro kwenye Uwanja wa Mabatini, Pwani ilihali Mwadui ya Shinyanga itaikaribisha Toto Africans ya Mwanza kwenye Uwanja wa Mwadui Complex.
Jumapili, Desemba 18, mwaka huu Mbao FC ya Mwanza itacheza na Stand United ya Shinyanga kwenye Uwanja wa CCM Kirumba, Mwanza wakati Ndanda itakuwa mwenyeji wa Vinara wa Msimamo katika Ligi Kuu ya Vodacom, Simba kwenye Uwanja wa Nangwanda Sijaona, Mtwara.
African Lyon ya Dar es Salaam itaikaribisha Azam FC pia ya Dar es Salaam kwenye Uwanja wa Uhuru jijijini siku hiyo ya Jumapili wakati Majimaji ya Songea itakuwa Mbeya kucheza na Tanzania Prisons kwenye Uwanja wa Sokoine.
Shirikisho la Mpira wa Miguu Tanzania, limetoa masharti kadhaa likitaka klabu za Ligi Kuu ya Vodacom kufuata. 
Masharti hayo, ni kwa klabu kutumia makocha wenye sifa kwa mujibu wa kanuni ya 72 ya Ligi Kuu ya Vodacom. Kwa mujibu wa Bodi ya Ligi Kuu ya Shirikisho la Mpira wa Tanzania (TFF) na kwa mujibu wa kanuni hiyo, makocha wanaopaswa kukaa kwenye benchi la Ligi kuu kwa msimu huu wasipungue sifa ya kuwa na leseni B ya CAF.
Pia kwa timu za Ligi Daraja la Kwanza na Pili, masharti ni lazima makocha wawe na sifa za kuzinoa timu hizo ambazo zimeanishwa kwenye kanuni za ligi husika.
Kadhalika, tunaagiza klabu kutotumia wachezaji wa kigeni au makocha kama hawana vibali vya ukaazi na kufanya kazi kutoka Idara ya Uhamiaji nchini iliyoko chini ya Wizara ya Mambo ya Ndani. 
…………………………………………………………………………………………………

IMETOLEWA NA SHIRIKISHO LA MPIRA WA MIGUU TANZANIA



Shirikisho la Mpira wa Miguu Tanzania (TFF) limemteua Bi. Aziza Badru Mwanje kuwa Mkurugenzi mpya wa Fedha na Utawala kuanzia Januari Mosi, 2017.

Uteuzi huo umefanywa leo (Desemba 17, 2017) na Kamati ya Utendaji ya TFF kufuatia mchakato wa usaili uliohusisha waombaji wengine wawili na kufanywa na Bodi ya Ajira ya TFF.

Vilevile Kamati ya Utendaji imefanya mabadiliko ya wajumbe katika Kamati ya Sheria na Hadhi za Wachezaji ambapo Wakili Patrick Sanga atakuwa Makamu Mwenyekiti wakati Mwenyekiti anaendelea kuwa Wakili Richard Sinamtwa.

Wajumbe wengine walioongezwa kwenye Kamati hiyo ni Bw. Adam Mihayo na Bw. Hassan Hassanoo ambaye pia ni Mwenyekiti wa Chama cha Mpira wa Miguu Mkoa wa Pwani (COREFA).

Wakili Raymond Wawa ameteuliwa kuwa Mjumbe wa Kamati ya Rufani ya Uchaguzi ya TFF kuziba nafasi ya Bw. Joseph Mapunda ambaye ameomba kupumzika.

Pia Bibi Mia Mjengwa ameteuliwa kuwa Mjumbe wa Kamati ya Mpira wa Miguu wa Wanawake.

IMETOLEWA NA SHIRIKISHO LA MPIRA WA MIGUU TANZANIA


Na Dina Ismail
MSHAMBULIAJI  THOMAS  Ulimwengu amekataa ofa ya dola 400,000 alizopewa na klabu moja ya moja ya daraja la kwanza nchini Qatar.
Ulimwengu  ambaye aliyekuwa akitumikia klabu ya TP Mazembe ya Jamhuri ya Kidermokrasia ya Congo (DRC) kwa miaka mitano  kwa sasa yupo nchini baada ya kumaliza mkataba mwezi Oktoba mwaka huu.
Mazembe walitaka kumuongeza Ulimwengu mkataba mwingine lakini alikataa kwa madai anataka kwenda kucheza soka la kulipwa barani Ualaya.
Mmoja ya waratibu wa mchezaji huyo, aliliambia gazeti hili kwamba, Ulimwengu amekataa ofa hiyo kwani akili yake ipo zaidi katika timu za Ubelgiji.

pamoja na kupokea ofa nyingi kutoka klabu mbalimbali ndani na nje ya bara la Afrika lakini wameweka malengo mchezaji huyo kusakata kabumbu barani Ulaya.
Aliogeza kuwa, mbali na timu hiyo kutoka Qatar, timu kadhaa zikiwemo Mamelody Sundowns ya Afrika Kusini na nyinginezo zilitaka pia kumsajili lakini amegoma. 

Na Dina Ismail
WAKATI mzunguko wa pili wa Ligi Kuu Bara unatarajiwa kuanza leo, dirisha dogo la usajili kwa timu shiriki linafungwa rasmi lilifungwa rasmi juzi huku tukishudia kila timu ikijaribu kufanya mabadiliko.
Kwa wiki kadhaa tumekuwa tukisikia habari za usajili wa wachezaji mbalimbali ambao wanadaiwa kuachwa ama kuhitajiwa na timu hizo.
Kila timu ilikuwa katika harakati za kusajili wachezaji ambao inadhani uwepo wao utaziwezesha timu zao kufanya vema katika ligi hiyo na michuano mingine na hatimaye kutwaa ubingwa.
Zoezi  la kuacha au kusajili mchezaji linafanywa na viongozi wa timu wakifuata mapendekezo ya makocha wa timu husika.
Lakini shughuli inakuja kipindi cha Ligi kwani makocha wanashindwa kuwa ‘fair’ katika matumizi ya wachezaji  katika michezo mbalimbali.
Hii ina maana kwamba, makocha ndio waliowataka wachezaji hao wasajiliwe katika timu zao, lakini matokeo  hushindwa kuwatumia ipasavyo hivyo kuonekana mizigo.
Kwamba, kocha alimuona mchezaji fulani anafaa na akaagiza asajiliwe na tena wengine huasajiliwa kwa kiasi kikubwa cha fedha lakini na baada ya kuanza kwa ligi kocha anashinda kumtumia.
Kuna baadhi huwa na bahati kwa kuwa mchezaji chaguo la kwanza msimu mzima, wengine hujikuta mchezaji wa akiba na wengine sasa huishia mazoezini tu.
Sasa hali ya kusajili mchezaji na kutomtumia ni kama na ufujaji wa pesa na pia kuua kipaji cha mchezaji.
Kwani, ni bora usajili wachezaji wachache ambao unaamini watakufaa katika ligi na pesa nyingine itumike kwa matumizi mengine au kumsajili mchezaji ambaye atapata nafasi ya kucheza na kuendeleza kipaji chake.
Wenzetu nchi zilizopiga hatua tumeona wachezaji wakicheza kwa kupiokezana yaani hakuna wasugua benchi wa kudumu na ndio maana wanapata mafanikio makubwa.
Lakini kwa hapa Tanzania naweza kusema makocha ndio wanaua vipaji vya wachezaji kwani naamini kuna wachezaji ni wazuri tu tunawaona kwenye mazoezi lakini hawapewi nafasi sana wakibahika kucheza ni mchi za kirafiki.
Mpira ni ajira, kama mchezaji hafai ni bora kumuacha aende sehemu inayomuhitaji akacheze na maisha yaendelee kuliko kumsugulisha benchi na matokeo yake hata kipaji kinaishia benchi;ndiyo mchezaji hata kama anakipaji kikubwaa akikaa benchi sana anajikuta anapoteza mwelekeo.
Mchezaji amepambana mpka kufikia hatua ya kucheza ligi kuu bara, anasajiliwa na kupewa kitita kizuri tu, lakini mwisho wa siku anashindwa kutimiza wajibu wake sababu ni kocha kutompanga.
Ifikie mahali makocha nao wawe na roho za kibinadamu kwani kama nao wangefanywa hivyo hii leo wangekuwa makocha?
Nadhani tutarajie mabadiliko ya upangaji wa vikosi katika mzunguko huu wa pili uwe wa  haki na usawa na si upendeleo kama inavyodhaniwa ili kuendeleza na kukuza vipaji.
Kuna timu zimepandisha wachezaji vijana ni vema wakapewa nafasi za kucheza mara moja moja ili kuwapa uzoefu kwani bila kufanya hivyo watatoa wapi uzoefu.
Kila la heri makocha wa timu shiriki, George Lwandamina (Yanga), Joseph Omog (Simba), Ali Bushir (Mwadui), Suleiman Matola (Nanda Fc), Ettiene Ndalyagije (Mbao Fc), Mecky Mexime (Kagera Sugar), Kinnah Phiri (Mbeya City) na Athuman Bilal (Stand United).

Pia wapo Salum Mayanga (Mtibwa Sugar), Zeben Hernandez (Azam Fc), Kally Ongala (Majimaji), Hamimu Mahadh (Tz Prisons), Fernando Jose Bernado Tavares ( African Lyon),Jurgen Seitz (Toto African) na  Malale Hamsini (Ruvu Shooting).

MKALI wa bongo Fleva, Elibariki Munisi maarufu kama Ney wa Mitego au Mr. Nay ameaachia singo yake mpya inayokwenda kwa jina la 'Sijiwezi', kibao hicho kimetayarisha katika studio za Free Nation.



Na Dina Ismail
HIVI  karibuni  uongozi  wa Klabu ya Simba, ulidai kutokuwa  tayari  kwa  timu  yao  kucheza  mechi yoyote  na  mahasimu  wa  jadi  Yanga iwapo watatumika  waamuzi  wa hapa nchini.
Mkuu wa Kitengo cha Habari na Mawasiliano wa Simba, Haji Manara  amesema kwamba  wamefikia uamuzi huo baada ya kuchoshwa na  uonevu  wa dhahiri wanaofanyiwa na waamuzi hao kila  wanapokutana.
Simba wameliomba Shirikisho la Soka Tanzania (TFF) kutumia waamuzi kutoka nje ya nchi katika mechi zao na Yanga, ili haki itendeke, huku wakitarajia kumuandikia barua rasmi  Rais wa TFF, Jamal Malinzi juu wa uamuzi wao.
Manara aliweka wazi kuwa kila wanapocheza na Yanga waamuzi wamekuwa wakiwaonea kwa makusudi  huku wakionesha dhari kwamba wametumwa.
“Kuna matukio mengi ya kustaajabisha yamekuwa yakitolewa na waamuzi pindi tunapocheza na mahasimu wetu, wachezaji wanapewa kadi bila kosa la kueleweka, magoli  yetu halali yanakataliwa, wenzetu wanafunga magoli ya utata yanakubaliwa na mengine mengi”, alisema
Akienda mbali zaidi, Manara alisema wachezaji wao wamekuwa wakifanyiwa vitendo vingi visivyo vya kimichezo na wapinzani wao lakini waamuzi hao wanaishia kuwaadhibu wachezaji wao tu.
“Tumechoshwa na hii hali kwa kweli, hatutokuwa tayari kuingiza timu uwanjani iwapo waamuzi watakuwa ni wale wale”, aliongeza Manara
Manara alisema watakuwa tayari hata mapato yao yote  ya mchezo wao kutumika kwa ajili ya kugharamia waamuzi kutoka nje  kuweza kuchezesha mechi yao ili kuwepo na haki.
Ukiangalia kauli ya Simba ina mashiko makubwa na hasa ikizingatiwa kuwapo kwa malalamiko  ya kuboronga kwa waamuzi si katika mechi za Simba na Yanga tu hata katika mechi mbaloimbali za Ligi Kuu Kuu Bara.
Mfano hivi karibuni katika  mchezo baina yao katika duru la kwanza la Ligi Kuu Bara uliopigwa Oktoba Mosi kwenye Uwanja wa  Taifa jijini Dar es Salaam na kumalizika kwa sare ya bao 1-1, mwamuzi Martin Saanya alilikataa bao halali la Simba na kulikubali bao la Yanga ambalo mfungaji aliukumbatia mpira kabla ya kufunga.
Katika mchezo huo pia Saanya alimtoa nje kwa kadi nyekundu  Nahodha wa Simba, Jonas Mkude kwa kadi nyekundu kabla ya kamati ya Saa 72 ya Uendeshaji na Usimazi wa Ligi kuifuta baada ya kuona hakufanya kosa.
Kama hiyo haitoshi, kamati hiyo baada ya kupitia kwa kina ripoti ya mchezo huo,  iliamua kumfungia  kuchezesha soka kwa miaka miwili  Saanya  pamoja na Msaidizi wake, namba moja, Samu Mpenzu ambaye anadaiwa kukataa  la Simba lililofungwa na Ibrahim Hajib mapema kipindi cha kwanza akidai aliotea.
Katika mchezo huo, maamuzi ya utata ya Saanya yalisababisha vurugu baada ya Yanga kupata bao la kuongoza lililofungwa na mshambuliaji Mrundi, Amissi Tambwe katika  dakika ya 26, akimalizia pasi ndefu ya beki Mbuyu Twite.
Bao la Tambwe lilizua kizaazaa  ndipo wachezaji wa Simba wakamvaa Saanya wakidai  Tambwe aliushika mpira kabla ya kufunga. Na katika vurugu hizo, Saanya alimtoa kwa kadi nyekundu Mkude dakika ya 29 kwa sababu ndiye aliyekuwa mstari wa mbele.
Hali hiyo ilipelekea mchezo kusimama  kwa takriban dakika tano baada ya mashabiki wa Simba kuanza kufanya vurugu waking’oa viti na kutupa uwanjani kabla ya Polisi kuanza kutumia  milipuko ya gesi za kutoa machozi kuwatuliza kabla ya mchezo kuendelea na  Simba kusawazisha dakika ya 87 kwa bao la Shizza Kichuya.
Kilio kwa waamuzi haliko kwa Simba peke yao kwani hata Yanga imekuwa ikilalamikia baadhi ya waamuzi wanaopangwa katika mechi zao na Simba kwa nyakati tofauti huku Simba ikionekana kuwa muhanga zaidi wa maamuzi tata.

Kwa hali hiyo, TFF  inapaswa kuzingatia na kulichukulia  kwa malalamiko ya  Simba ili kuweza kupatikana nusura  kwa  soka la Tanzania.

Na Dina Ismail
HAKUNA ubishi kutokuwepo ama kupungua kwa vituo vya kulea vipaji vya michezo nchini ‘Academy’ pamoja na michuano ya mashule kwa ngazi ya msingi (UMITASHUMTA) na sekondari (UMISSETA) kumechangia kwa kiasi kikubwa kushusha kiwango cha michezo Tanzania.
Hiyo inatokana na maeneo hayo kuwa chanzo cha kupatikana kwa wachezaji chipukizi ambao baadaye wanakuja kuwa tegemeo katika vilabu mbalimbali hapa nchini na timu za Taifa,kiasi ca kushindwa kufanya vema katika michunao ya kimataifa.
Kutofanya vema katika michezo pia  kumepelekea wadau na hata makampuni mabalimbali kupunguza nguvu zao katika kutoa sapoti kwa timu ama timu za Taifa.
Vyama vya michezo mbalimbali nchini vimekuwa vikilia na makampuni ili kusaidia kudhimini timu za michezo husika  badala ya kuimarisha upatikanaji wa wachezaji wazuri ambao uwepo wao kwa timu za Taifa utawavuta kirahisi wadhamini.
Dawa yake ni kuhakikisha vituo vya kzalisha, kukuza na kuendeleza vipaji vya vijana,pamoja na michuano ya mashule inarejeshwa kwa kasi na usimamizi wa hali ya juu.
Kwa kushirikiana na wizara ya habari utamaduni na michezo, vyama hivyo havina budi kuweka mikakati madhubuti katika taasisi hizo ili baadaye tuanze kupata matunda mazuri na kurejesha heshima ya Tanzania.
Licha ya baadhi ya michezo kuonesha kujitutumua katika medani ya kimataifa lakini hali bado si nzuri sana kwani matunda yake yanatokana zaidi na juhudi binafsi za mchezaji kwa kusimamiwa na chama chake kwa ukaribu.
Nchi kama Nigeria, Cameroon, Ghana, Brazil, Misri, Ivory Coast, Marekani, Kenya, Afrika Kusini na nyinginezo ambazo zinafanya vema kwenye michezo mbalimbali zina vituo maalum vya kulea vijana pia vyama vyake vya soka na Serikali  kuwa na ushirikiano wa karibu katika kuviendeleza.Na matunda yake tunayaona.
 Ikumbukwe katika miaka ya nyuma ambapo Tanzania ilikuwa ikifanya vema zaidi katika michezo, wengi wa wachezaji walikuwa wanatokea katika mashindano ya mashule au vituo vya kulea, kukuza na kuendeleza  vipaji.
Baadhi ya wachezaji nyota walikuwa wakitokea katika vituo hivyo hivyo kuwa rahisi kuwepo kwa ushindani na ari kwa vijana wanaojifunza ili kuweza kupata namba katika timu kubwa na hata kuchaguliwa timu za taifa.
Mfano ni mdau mkubwa wa michezo aliyepata kuwa Mwenyekiti wa Baraza la Michezo  (BMT) Iddi Kipungu alifanikisha kwa kiasi kikubwa kuzalisha nyota wengi mwishoni mwa miaka ya 1990 ambapo baadhi yao wanatamba hadi sasa.
Kipingu enzi hizo akiwa mkuu wa Sekondari ya Makongo alikuwa akisaka wacezaji wenye vipaji kupitia michauano ya mashule na hata mitaani ambapo aliwachukua wachezaji wenye vipaji toafauti na kuwaingiza shuleni kwake.
Makongo ilikuwa kituo bora kabisa cha uzalishaji wa wachezaji mbambali kwa michezo kama riadha, soka, kikapu, wavi, vishale n.k. Pia  wasanii wa tasnia tofauti ambao kila mmoja alipikwa katika sekta yake na kuiva vizuri sana, kimichezo na fikra pia.
Uwepo wa makongo pia ulileta hamasa kubwa ya kuanzishwa kwa vituo mbalimbali vya michezo ambavyo pia vilijitahidi kwa namna moja ama nyingine kuzalisha nyota mbalimbali.
Hivyo basi, baadhi ya timu zilikuwa zikipigana vikumbo kusasijili wachezaji ambao iliwaona wanafaa kuzichezea timu zao ili ziweze kufanya vema katika michuano inayoshiriki.
Pia faida ya Makongo tuliiona hata kwa timu ya Taifa za Taifa za soka na hata riadha kwani asilimia kubwa ya wachezaji waliokuwemo walitokea hapo.
 Taratibu hali ya ubora  na viwango vya wachezaji imekuwa ikiondoka na matokeo yake Tanzania kujikuta inashuka katika medani ya michezo ya kimataifa.
Ni baada ya Kipingu kustaafu Makongo huku pia vituo vingine vya michezo vikifanya bora liende kabla ya kupotea kabisa.
Hapo katika serikali nayo ilipigaga marufuku kuwepo kwa michuano ya mashule hali hiyo nay ilichangua kushusha kiwang cha michezo kwani mchezaji mzuri huandaliwa tangu akiwa mdogo.Kwa sasa imerudishwa lakini hali bado si nzuri.
Kwa hali hiyo ni wakati wa serikali na wadau wa soka kurwejesha hamasa ya michezo kwa kufufua vituo hivyo, kuanzisha na kusimamia vizuri mashindano ya mashule ili tuweze kufanya vema na kurejesha heshima ya nchi.

Kwa kuonesha umakini kutarejesha hata makampuni ama taasisi ambazo zilikuwa zinatoa fedha kudhamini kabla ya kusitisha kurejea na kutoa sapoti na mwisho wa siku faida tutaiona.
Na Baby Akwitende, Tanga
YANGA SC imekula ngwala katika mbio za ubingwa wa Ligi Kuu ya Vodacom Tanzania Bara baada ya kuchapwa mabao 2-1 na Mgambo JKT Uwanja wa Mkwakwani, Tanga.
Hadi mapumziko tayari Mgambo JKT walikuwa mbele kwa bao 1-0, lililofungwa na Fully Maganga dakika ya kwanza tu ya mchezo akimalizia pasi ya Bashiru Chanacha.
Lilikuwa ni shuti la ghafla alilofumua mchezaji huyo mara tu baada ya kupata pasi, ambalo lilimkuta kipa Juma Kaseja akuiwa hajajiandaa kuokoa na kumpita kiulaini.
Hawa Mgambo hawafai; Kocha wa Yanga SC, Hans van der Pluijm leo amefungwa 2-1 na Mgambo Tanga
Mgambo ilipata pigo dakika ya 30 baada ya mchezaji wake, Mohamed Neto kutolewa nje kwa kadi mbili za njano, ya kwanza akikataa kukaguliwa na refa Alex Mahagi na ya pili kuzozana na refa huyo akipinga kusachiwa kama amebeba hirizi.
Dakika ya 32 kipa wa Mgambo, Saleh Tendega aliumia na nafasi yake kuchukuliwa na Tony Kavishe.
Kipindi cha pili Yanga SC walirudi kwa nguvu na kufanikiwa kusawazisha bao kwa penalti dakika ya 52 kupitia kwa Nahodha wake, Nadir Haroub ‘Cannavaro’, baada ya bi wa Mgambo kuunawa mpira katika eneo la hatari.
Mgambo walicharuka baada ya bao hilo na kuanza kushambulia mfululizo langoni mwa Yanga na dakika ya 63 wakapata bao la ushindi.
Bao hilo lilifungwa kwa penalti na Malimi Busungu baada ya yeye mwenyewe kuangushwa kwenye eneo la hatari na beki wa Yanga SC, Kevin Yondan.      
Matokeo hayo yanaifanya Azam iendelee kubaki kileleni kwa pointi zake 53 baada ya mechi 23, wakati Yanga SC inabaki na pointi zake 46 baada ya mechi 22.
Kikosi cha Yanga SC kilikuwa; Juma Kaseja, Mbuyu Twite, Oscar Joshua, Nadir Haroub ‘Cannavaro’, Kevin Yondan, Frank Domayo, Simon Msuva/Hamisi Kiiza dk77, Hassan Dilunga, Didier Kavumbangu, Mrisho Ngassa/Hussein Javu dk61 na Emmanuel Okwi. 
Mgambo JKT; Saleh Tendega/Tony Kavishe dk32, Salim Mlima, Salim Gilla, Bashiru Chanacha, Bakari Mtama, Novatus Lukunga, Mohammed Samatta, Peter Mwalyanzi/Awadh Yassin dk88, Mohamed Neto, Fully Maganga na Malimi Busungu. 
CHANZO: BIN ZUBEIRY Blog
Na Mahmoud Zubeiry, Dar es Salaam
AZAM FC imezidi kupiga kasi katika mbio za ubingwa wa Ligi Kuu ya Vodacom Tanzania Bara baada ya jioni hii kukiagusha kigogo, SImba SC kwa mabao 2-1 Uwanja wa Taifa, Dar es Salaam.
Matokeo hayo yanaifanya Azam itemize pointi 53 baada ya mechi 23, wakati Yanga SC inabaki na pointi zake 46 baada ya mechi 22.
Shujaa; Mfungaji wa bao la ushindi la Azam FC kulia akipiga shuti pembeni ya kiungo wa Simba SC, Jonas Mkude
Shukrani kwake mshambuliaji John Raphael Bocco ‘Adebayor’ aliyefunga bao la ushindi dakika ya 56 kwa kichwa kufuatia pasi ya tika tak ya Kipre Herman Tchetche. 
Tayari timu hizo zilikuwa zimekwishafungana bao 1-1 hadi mapumziko, Azam FC wakitangulia kupata bao lao kupitia kwa Khamis Mcha Vialli dakika ya 16 na Simba SC wakisawazisha kupitia kwa Joseph Owino dakika ya 45 na ushei.
Mcha alifunga bao kwa urahisi baada ya kutengewa mpira kwa kifua na Kipre Tchetche aliyepokea krosi Gardiel Michael- ambaye naye alipata pasi ya John Bocco aliyefanya kazi kubwa ya kupanda na mpira kutokea nyuma.
Owino alifunga kwa kichwa akiunganisha mpira wa adhabu uliopigwa na winga machachari, Ramadhani Singano ‘Messi’.
Kikosi cha Simba SC kilikuwa; Ivo Mapunda, William Lucian ‘Gallas’, Issa Rashid ‘Baba Ubaya’, Joseph Owino, Donald Mosoti, Jonas Mkude, Henry Joseph/Abdulhalim Humud dk66, Haruna Chanongo, Amisi Tambwe, Uhuru Suleiman na Ramadhani Singano ‘Messi’.
Azam FC; Aishi Manula, Erasto Nyoni, Gardiel Michael, Aggrey Morris, David Mwantika, Kipre Balou, Himid Mao/Bryson Raphael dk75 , Salum Abubakar ‘Sure Boy’, John Bocco ‘Adebayor’, Kipre Tchetche/Brian Umony dk80 na Khamis Mcha ‘Vialli’/Kevin Friday dk55.
CHANZO: BIN ZUBEIRY Blog
Na Mahmoud Zubeiry, Dar es Salaam
BONDIA Thomas Mashali amefanikiwa kutwaa taji la WBO uzito wa Light Heavy baada ya kumshinda kwa pointi Japhet Kaseba usiku wa jana kwenye ukumbi wa PTA, Sabasaba, Temeke mjini Dar es Salaam.
Majaji wote watatu walimpa ushindi bondia wa Manzese wa pointi 97-93 dhidi ya mbabe wa Kinondoni baada ya pambano hilo la raundi la 10, ambalo lilimalizika bila mtu kuanguka chini hata kwa sekunde wala kuhesabiwa kwa kuleweshwa ngumi.

Mshindi juu; Thomas Mashali akiwa amebebwa juu na mashabiki wake baada ya kutangazwa mshindi dhidi ya Japhet Kaseba

Kaseba aliyepanda ulingoni na mbwembwe nyingi, alianza vibaya katika raundi mbili za kwanza kabla ya kusimama imara katika raundi ya tatu na kumsukumia makonde mazito mpinzani wake.
Kaseba alirudi kwa kujiamini raundi ya nne na kumtandika mpinzani wake katika raundi yote hiyo. Hata hivyo, Mashali alizinduka raundi ya tano na kumdhibiti mpinzani wake, akianza kurusha ngumi za mbali na kuhama upande haraka.
Raundi ya sita, Kaseba aliingia na maarifa ya kupiga na kukumbatia hatimaye kufanikiwa kumpunguza kasi Mashali.
Kaseba alifanya vizuri katika raundi ya saba na ya nane, lakini Mashali akazinduka raundi ya tisa na kumalizia ya 10 pia vizuri.

Thomas Mashali kulia akipambana na Japhet Kaseba kushoto

Japokuwa hata matokeo yangetangazwa sare kusingekuwa na malalamiko, lakini Japhet aliridhia uamuzi wa majaji na kumkumbatia Mashali baada ya pambano.
Pamoja na ushindi, lakini Mashali hakucheza katika kiwango chake kiasi cha kumaliza raundi 10 na rasta mwenzake huyo ambaye kwa sasa anacheza ngumi kwa kulazimisha tu, kwani uwezo uliofanya akaitwa ‘Champ’ umekwishamkimbia. 

Bingwa na mataji; Thomas Mashali akiwa na mikanda yake baada ya kumshinda Japhet Kaseba
Katika mapambano ya utangulizi, Alan Kamote alimshinda kwa Technical Knockout (TKO) raundi ya tano Karage Suba na kutwaa ubingwa wa UBO uzito wa Light, pambano kati ya Freddy Sayuni na Rajab Maoja lilivunjika raundi ya nne baada ya Maoja kuchanika na kushindwa kuendelea kugombea ubingwa wa PST.  
Said Mundi alimpiga Jumanne Mohamed kwa pointi pambano la uzito wa bantam, Issa Nampepeche alimpiga kwa pointi Zuberi Kitandula uzito wa bantam pambano lisilo la ubingwa, Saidi Chaku alitoka sare na Jocky Hamisi pambano la Feather lisilo la ubingwa na Majid Said alimpiga kwa pointi Frank Zaga uzito wa bantam pambano lisilo la ubingwa pia.

CHANZO; BIN ZUBEIRY BLOG (bongostaz.blogspot.com)